புறநானூறு (வை.வேதரெத்தினம் உரை) (312) ஈன்று புறந்தருதல் !

 

புறநானூறு (312) ஈன்று புறந்தருதல் என்தலைக் கடனே !

 

=============================

பாடியோர்:

=============================

பொன்முடியார். பொன்முடியார் சங்க காலத்தில் வாழ்ந்த ஒரு தமிழ்ப் பெண்புலவர். மறக்குடியில் பிறந்தவராக குறிப்புகள் கிடைகின்றன. இவர் சேரநாட்டின் ஒரு பகுதியான குட்டநாட்டின் வடக்குப்பக்கத்தில் பொன்முடி நல்லூர் என்னும் ஊரில் பிறந்தவர் ஆவார். இவரின் பெருமையைப் பாராட்டி அரசர் எவரேனும் பொன்முடி பரிசளித்து இருக்கலாம் என்கிறார் உ.வே.சா.  இவர் இயற்றியதாக  புறநானூற்றில் மூன்று பாடல்கள்  பாடல்கள் உள்ளன. அவை 299, 310, 312 வரிசை எண்களில் உள்ளன. இவரின் பெயரால் பொன்முடி என்ற ஊர் பெயர் உருவாகி, தற்பொழுது அது மருவி “பொம்மிடி” என மாறி இருக்கலாம். இவ்வூர் இப்பொழுது தருமபுரி மாவட்டத்தில் உள்ளது !

 

=============================

பாடப்பட்டோர்:

=============================

எவருமிலர்.

 

=============================

பாடலின் பின்னணி

==============================

ஒரு சிறந்த போர் வீரனை உருவாக்குவதில் யார் யாருக்குப் பங்கு இருக்கிறது என்பதை விளக்குகிறார் பொன்முடியார் இப்பாடலில் !

==============================

திணை : வாகை.

துறை : மூதில்முல்லை.

===============================

 ==============================================

புறநானூறு (312) ஈன்று புறந்தருதல் என்தலைக் கடனே !

===============================================

 

ஈன்று புறந்தருதல் என்தலைக் கடனே,
சான்றோன் ஆக்குதல் தந்தைக்குக் கடனே,
வேல்வடித்துக் கொடுத்தல் கொல்லற்குக் கடனே,
நன்னடை  நல்கல் வேந்தற்குக் கடனே,
ஒளிறு வாள் அருஞ்சமம் முருக்கிக் 
களிறு எறிந்து பெயர்தல் காளைக்குக் கடனே !

 

===============================================

 

 =============================

சொற்பொருள்:  

==============================

 

ஈன்று புறம் தருதல் = பெற்று, பாலூட்டி, சீராட்டி வளர்த்து விடுதல் ;  என்தலைக் கடனே =  தாயாகிய எனது முதன்மையான கடமை ஆகும்; சான்றோன் ஆக்குதல் =  நற்பண்புகளும் நல்லியல்புகளும் உடையவனாக வளர்த்தல் ; தந்தைக்குக் கடனே =  தந்தையின் கடமை ஆகும்  ; வேல் =  வடித்துக் கொடுத்தல் – போர்க்கருவியான வேலைச் செய்து கொடுத்தல் ; கொல்லற்குக் கடனே = இரும்பு வினைஞரின் (கொல்லனின்) கடமை ஆகும்.

 

நன்னடை நல்கல் =  நல்ல போர்ப் பயிற்சியை அளிக்கச் செய்வது ;   வேந்தற்குக் கடனே – வேந்தனின் கடமையாகும். ஒளிறு வாள் அருஞ் சமம் முருக்கி =  ஒளிரும் வாள் கொண்டு போர் செய்து ; களிறு எறிந்து = தன்னைக் கொல்ல வரும் யானையை வேல் கொண்டு தாக்கிக் கொன்று ;  பெயர்தல் – வெற்றியோடு மீளுதல், காளைக்குக் கடனே – இளங் காளையான ஆண்மகனின் கடமை யாகும் !

 

=============================

பொருளுரை:  

=============================

 

மகனைப் பெற்று வளர்த்து ஆளாக்குதல் எனது முதன்மையான கடமை.  அவனைக் கல்வியும், நற்பண்புகளும் நிறையப் பெற்ற சான்றோனாக ஆக்குவது அவனுடைய தந்தையின் கடமை.  அவனுக்குக் கூரிய வேலை வடித்துக் கொடுப்பது கொல்லனின் கடமை.  நல்ல போர்ப் பயிற்சியை அளிக்கச் செய்வது நாட்டை ஆளும் வேந்தனின் கடமை.  ஒளிரும் வாளை ஏந்திப் போர் செய்து பகைவரின் யானைகளைக் கொன்று வெற்றியோடு திரும்பி வருவது அந்த இளைஞனின் கடமை !

 ===============================================

ஆக்கம் + இடுகை,

வை.வேதரெத்தினம்,

(veda70.vv@gmail.com)

ஆட்சியர்,

“புறநானூறு” வலைப்பூ,

[திருவள்ளுவராண்டு; 2057, மடங்கல் (ஆவணி)16]

(02-09-2026)

================================================ 

தாயும் சேயும்

புறநானூறு (வை.வேதரெத்தினம் உரை) (191) யாண்டு பலவாக நரையில !

 

புறநானூறு (191) யாண்டு பலவாக, நரையில ஆகுதல் !

=============================

பாடியவர் :

=============================

பிசிராந்தையார், பிசிராந்தையார் சங்ககாலப் புலவர்களில் ஒருவர் ஆவார். இவர் பாடியனவாகச் சங்கநூல் தொகுப்பில் ஆறு பாடல்கள் உள்ளன. புறநானூற்றில் நான்கும், அகநானூற்றில் ஒன்றும், நற்றிணையில் ஒன்றுமாக இவரது பாடல்கள் இடம்பெற்றுள்ளன. நேரில் காணாமலேயே கோப்பெருஞ்சோழன் மீது பெருமதிப்பு வைத்திருந்தார். இந்த மதிப்பு   விரைவில்   இறுகிய   நட்பாக   மலர்ந்தது.   கோப்பெருஞ்சோழன் தன் பிள்ளைகள் மீது கொண்டிருந்த மன வருத்தத்தால், வடக்கிருந்த போது பிசிராந்தையாரும் அங்குச் சென்று அவனுடன் வடக்கிருந்து  உயிர் துறந்தார்.

=============================

பாடப்பட்டோர்:

=============================

எவருமிலர்.

==============================

திணை : பொதுவியல்

துறை : பொருண்மொழிக் காஞ்சி

====================================

பாடலின் பின்னணி: 

=====================================

தனக்கு அகவை முதிர்ந்தும் கூட, தன் தலைமுடி நரையின்றி இருப்பதற்கான  காரணங்களை  இப்பாடலில் பிசிராந்தையார் கூறுகின்றார் !

======================================

===============================================

புறநானூறு (191) யாண்டு பலவாக, நரையில ஆகுதல் !

===============================================

யாண்டு பலவாக, நரையில ஆகுதல்
யாங்கு ஆகியர் என வினவுதிர் ஆயின்,
மாண்ட என் மனைவியோடு மக்களும் நிரம்பினர்,
யான் கண்ட அனையர், இளையரும், வேந்தனும்
அல்லவை செய்யான், காக்க அதன்தலை 
ஆன்று அவிந்து அடங்கிய கொள்கைச்
சான்றோர் பலர், யான் வாழும் ஊரே.

===============================================

===========================

சொற்பொருள்:  

============================

யாண்டு பலவாக =  நீர் பிறந்து பல ஆண்டுகள் ஆகிவிட்டன, முதுமை அடைந்துவிட்டீர்கள் ; நரை இல ஆகுதல் =  ஆனால் தலைமுடி நரைக்கவில்லை ;  யாங்கு ஆகியர் = இஃது எப்படி உங்களால் முடிந்தது;  என வினவுதிர் ஆயின் = எனக் கேட்பீர்களாயின்  ; மாண்ட என் மனைவியோடு = சிறந்த பெண்மணியான என் மனைவியோடு ;  மக்களும் நிரம்பினர் = அறிவு நிறைந்த பிள்ளைகளும் வாய்த்தனர் ; யான் கண்ட அனையர் = நான் என்ன நினைக்கிறேனோ, அவ்வாறே நினைக்கும் ; இளையரும் = பணியாட்களும் அமைந்தனர் ; வேந்தனும் = என் நாட்டு மன்னனும் ; அல்லவை  செய்யான் = பிறருக்குத்  தீங்கு  செய்யாது ; காக்க = எம்மைப் பாதுகாக்கிறான் ;  அதன்தலை – அதற்கு மேல் ; ஆன்று அவிந்து அடங்கிய = பணிவும் அடக்கமும் கொண்ட ; கொள்கைச் சான்றோர் பலர் =  உயர்ந்த கொள்கைகளின்படி வாழும் சான்றோர்கள் பலரும் ; யான் வாழும் ஊரே = வாழ்கின்ற ஊரே நான் வாழும் ஊர் ஆகும் ; நரை இல ஆகுதல் =  அதனால்  எனக்குத் தலைமுடி நரைக்கவில்லை !

=============================

பொருளுரை:  

=============================

நீர் பிறந்து பல ஆண்டுகள் ஆகிவிட்டன, முதுமை அடைந்துவிட்டீர்கள், ஆனால் தலைமுடி நரைக்கவில்லை; இஃது எப்படி உங்களால் முடிந்தது எனக் கேட்பீர்களாயின், சொல்கிறேன்; சிறந்த பெண்மணியான என் மனைவியும், அறிவு நிறைந்த பிள்ளைகளும், எனக்கு வாய்த்திருக்கிறார்கள்.  நான் என்ன நினைக்கிறேனோ அவ்வாறே நினைக்கும் பணியாட்களும் அமைந்திருக்கின்றனர்.  என் நாட்டு மன்னனும் பிறருக்குத் தீங்கு செய்யாது  எம்மைப் பாதுகாக்கிறான்.  இவற்றுடன் பணிவும் அடக்கமும் கொண்ட உயர்ந்த கொள்கைகளின்படி வாழும் சான்றோர்கள் பலரும் வாழ்கின்ற ஊரே நான் வாழும் ஊர் ஆகும். அதனால்  எனக்குத் தலைமுடி நரைக்கவில்லை !

 ===============================================

ஆக்கம் + இடுகை,

வை.வேதரெத்தினம்,

(veda70.vv@gmail.com)

ஆட்சியர்,

“புறநானூறு” வலைப்பூ,

[திருவள்ளுவராண்டு; 2057, மடங்கல் (ஆவணி)16]

(02-09-2026)

================================================