புறநானூறு – பாடல் (182) உண்டால் அம்ம
இவ்வுலகம்!
===============================================
பாடியவர்: கடலுள் மாய்ந்த இளம்பெருவழுதி
===============================================
இவன் பாண்டிய மன்னர்
குலத்தைச் சார்ந்தவன். சங்க காலத்துத் தமிழ் மன்னர்கள், தங்கள்
கடற்படையைக் கொண்டு கடாரம், சாவகம், ஈழம்
போற நாடுகளுக்குச் சென்று போர்புரிந்து வெற்றி பெற்றவர்கள். அவர்களின் கடற்படை
போருக்குச் செல்லும் பொழுது மன்னர்களும் தம் கடற்படையோடு செல்வது வழக்கம். அவ்வாறு
கடற்படையோடு இளம்பெருவழுதி சென்ற பொழுது, அவன் சென்ற கப்பல்
கவிழ்ந்ததால் அவன் கடலில் மூழ்கி இறந்தான். ஆகவே, “கடலுள்
மாய்ந்த” என்ற அடைமொழி அவன் பெயரோடு இணைந்து கொண்டது !
===============================================
பாடப்பட்டவர்: எவருமிலர்.
===============================================
துறை: பொருண்மொழிக் காஞ்சி (உயிர்க்கு நலம் செய்யும் உறுதிப் பொருள்களை எடுத்துக் கூறுதல்)
===============================================
பாடலின் பின்னணி:
===============================================
இப்பாடலில், கடலுள் மாய்ந்த இளம்பெருவழுதி, மனித நேயத்தொடு தமக்காக உழைக்காமல், பிறர்க்காக வலிய முயற்சியுடன் உழைப்பவர்கள் இருப்பதால் தான் இவ்வுலகம் நிலைபெற்று இயங்கிக் கொண்டிருக்கிறது !என்ற உயர்ந்த கருத்தைக் கூறுகிறான் !
==============================================
புறநானூறு – பாடல் (182) உண்டாலம்ம இவ்வுலகம் — இந்திரர் !
==============================================
உண்டால் அம்ம, இவ்வுலகம் -- இந்திரர்
அமிழ்தம் இயைவது ஆயினும், ‘இனிது’ எனத்
தமியர் உண்டலும் இலரே; முனிவு இலர்;
துஞ்சலும் இலர்; பிறர் அஞ்சுவது அஞ்சி,
புகழ் எனின், உயிருங் கொடுக்குவர்; பழி எனின்,
உலகுடன் பெறினும், கொள்ளலர்; அயர்விலர்;
அன்ன மாட்சி அனையர் ஆகி,
தமக்கு என முயலா நோன் தாள்,
பிறர்க்கு என முயலுநர் உண்மையானே.
===============================================
சொற்பொருள்:
===============================================
பொருளுரை :
================================================
இந்திரனுக்குரிய
அமிழ்தம் கிடைத்தாலும், அது இனிமையானது என்று தனித்து உண்ண
மாட்டர்கள்; யாரையும் வெறுக்க மாட்டார்கள்; சோம்பலின்றிச் செயல்படுவார்கள்; பிறர் அஞ்சுவதற்குத்
தாமும் அஞ்சுவார்கள்; புகழ் வரும் என்றால் தம் உயிரையே
வேண்டுமானாலும் கொடுப்பர்; பழிவரும்
என்றால் உலகம் முழுவதும் கிடைப்பதானாலும் ஏற்றுக் கொள்ள மாட்டார்கள்; மனம் தளர மாட்டார்கள். இத்தகைய சிறப்புடையவர்களாகித் தமக்காக உழைக்காமல்,
பிறர்க்காக வலிய முயற்சியுடன் உழைப்பவர்கள் இருப்பதால்தான்
இவ்வுலகம் இயங்கிக்கொண்டிருக்கிறது.
===============================================
ஆக்கம் + இடுகை,
வை.வேதரெத்தினம்,
(veda70.vv@gmail.com)
ஆட்சியர்,
“புறநானூறு” வலைப்பூ,
[திருவள்ளுவராண்டு; 2057, கன்னி (புரட்டாசி)07]
(24-09-2026)
================================================